4 მაისს, საქართველოში აკრედიტებული დიპლომატიური კორპუსის წარმომადგენლებთან შეხვედრის დროს, საქართველოს პრეზიდენტმა პროვოკაციული უწოდა „ქართული ოცნების“ საპატიო თავმჯდომარის, ბიძინა ივანიშვილის განცხადებებს, რომლებიც მან 29 აპრილს, კონტრაქციაზე გამოსვლისას გააკეთა.
სალომე ზურაბიშვილმა ელჩებს უთხრა, რომ საქართველოში კრიტიკული ეტაპი დგება და მათი მთავრობების მხარდაჭერაა საჭირო.
„ვფიქრობ, რომ ეტაპი, რომელიც ახლა იწყება, ძალიან კრიტიკული იქნება - რადგან იქნება [„აგენტების კანონის“ - რ.თ. ] მესამე მოსმენა. ვფიქრობ, ცოტა პროვოკაციულად მოხდა თარიღების შერჩევა. ეს ყველაფერი ხდება სააღდგომო პერიოდში, რაც უნდა იყოს, პირიქით - გაერთიანებისა და დეპოლარიზაციის დრო...
ძალიან პროვოკაციული იყო ბატონი ივანიშვილის გამოსვლა - თქვენ მიმართ და საქართველოს მოსახლეობის მიმართ. ყველაფერი ეს ნიშნავს, რომ ჩვენ დაძაბულ ვითარებაში ვართ“, - სალომე ზურაბიშვილმა ელჩებს ბოდიში მოუხადა მათი ქვეყნების მისამართით „ქართული ოცნების“ ხელისუფლების მხრიდან გაჟღერებული სიტყვების გამო და ასევე უთხრა, რომ საქართველოს მოქალაქეებს კარგად ახსოვთ და აფასებენ საერთაშორისო პარტნიორების დახმარებას.
პრეზიდენტმა მიმართა უცხოელ ელჩებს, რომ მათ დიდი როლი ეკისრებათ სტაბილურობის უზრუნველყოფის პროცესში, საქართველოს მიერ ევროპული გზის გაგრძელების ძალისხმევასა და იმის აღქმაში, რომ „საქართველო არ არის მარტო“.
სალომე ზურაბიშვილმა ასევე აღნიშნა, რომ ხელისუფლების მიერ გადადგმული ნაბიჯები წარმოადგენს თავდასხმას საქართველოს კონსტიტუციაზე, სადაც „ძალიან ნათლად წერია, რა არის საქართველოს საგარეო პოლიტიკის მიმართულება და ორიენტაცია“. მან ასევე შენიშნა, რომ ეს დღეს „აშკარად არ განმეორდა“ აზიის განვითარების ბანკის კონფერენციაზე, რაც მისთვის კიდევ სხვა კურსის არსებობაზე მიუთითებს.
29 აპრილს, რუსთაველის გამზირზე, „ქართული ოცნების“ მიერ ორგანიზებულ კონტრაქციაზე გამოსვლისას, ბიძინა ივანიშვილმა აღნიშნა, რომ უცხოელები საქართველოს დახმარებას ტყუილად „ამადლიან“, რადგან მთელი დახმარება „სინამდვილეში თითქმის მთლიანად აგენტურის გამაგრებასა და ხელისუფლებაში მათ მოყვანას ხმარდება“.
„ამ თანხებს არავითარი საერთო არა აქვს დახმარებასთან და პირიქით, ერთადერთ მიზნად - საქართველოსთვის სახელმწიფო სუვერენიტეტის წართმევას ისახავს“, - თქვა ბიძინა ივანიშვილმა.
ფორუმი